હિંદુજા ગ્રુપના ચેરમેન અને એક સમયનાં બ્રિટનનાં સૌથી અમીર ઉદ્યોગપતિ એવા ગોપીચંદ પરમાનંદ હિંદુજાનું સોમવારે (4 નવેમ્બર) 85 વર્ષની ઉંમરે લંડનમાં નિધન થઈ ગયું.
રિપોર્ટ અનુસાર ગોપીચંદ હિંદુજા ઘણાં સમયથી બીમાર હતા અને હોસ્પિટલમાં દાખલ હતા. 2023માં મોટા ભાઈ શ્રીચંદ હિંદુજાના નિધન પછી તેમણે ગ્રુપની કમાન સંભાળી હતી.
આઝાદી પૂર્વેનાં સિંધમાં જન્મેલાં ગોપીચંદ હિંદુજા પોતે સિંધી હતા અને તેમનું બાળપણ મુંબઈની ગલીઓમાં વીત્યું, જ્યાં તેમણે જયહિન્દ કૉલેજમાંથી 1959માં ગ્રેજ્યુએશન કર્યુ હતું. ગોપીચંદ હિંદુજાએ 1959માં મુંબઈમાં ફેમિલી બિઝનેસ જૉઇન કર્યો.
ગોપીચંદ હિંદુજા એક વિઝનરી બિઝનેસમેન હતા, અને એટલે જ હિંદુજા ગ્રુપને એક ઇન્ડો-મિડલ ઇસ્ટ ટ્રેડિંગ કંપનીમાંથી બદલીને બેન્કિંગ, ફાઇનાન્સ, એનર્જી, ઓટોમોટિવ જેવા સેક્ટર્સમાં ફેલાયેલા ગ્લોબલ ઇન્ડસ્ટ્રિયલ પાવરહાઉસમાં તબદીલ કરી દીધું. તેમની લીડરશિપમાં ગ્રુપે 1984માં ગલ્ફ ઑઇલ અને ત્રણ વર્ષ પછી અશોક લેલેન્ડનું અધિગ્રહણ કર્યુ હતું.
