જાપાનમાં રાજકીય અને આર્થિક મોરચે મોટો વળાંક આવ્યો છે. વડાપ્રધાન સાનાઈ તાકાઈચીએ સંસદ ભંગ કરીને વહેલી ચૂંટણી (Snap Poll) યોજવાની જાહેરાત કરતાની સાથે જ જાપાનના બજારોમાં ભારે અસ્થિરતા જોવા મળી રહી છે.
ટેક્સમાં મોટી છૂટની જાહેરાત ચૂંટણી પહેલા વડાપ્રધાન તાકાઈચીએ મતદારોને રિઝવવા માટે ફૂડ આઈટમ્સ (ખોરાક) પરના 8% કન્ઝમ્પ્શન ટેક્સને બે વર્ષ માટે સ્થગિત કરવાની યોજના જાહેર કરી છે. આ જાહેરાતને કારણે સરકારી તિજોરી પર અંદાજે 5 લાખ કરોડ યેનનો બોજ પડશે, જેની સીધી અસર જાપાનના ડેટ માર્કેટ પર પડી છે.
બેંક ઓફ જાપાનની ચેતવણી આ ઘટનાક્રમ વચ્ચે જાપાનની સેન્ટ્રલ બેંક (BoJ) ના ગવર્નર કાઝુઓ ઉએડાએ શુક્રવારે જણાવ્યું હતું કે સરકારી બોન્ડના વ્યાજ દરો “ખૂબ જ ઝડપથી” વધી રહ્યા છે. આ વધારાને રોકવા માટે બેંક ઓફ જાપાન બોન્ડની ખરીદી વધારી શકે છે. ગવર્નરના આ નિવેદન બાદ કરન્સી માર્કેટમાં ભારે વોલેટિલિટી જોવા મળી હતી, જેમાં જાપાનીઝ ‘યેન’ ના મૂલ્યમાં મોટા ઉતાર-ચઢાવ આવ્યા હતા.
મોંઘવારીમાં વધારાની શક્યતા નિષ્ણાતોના મતે, જાપાનમાં મોંઘવારીનો દર લક્ષ્યાંક મુજબ સેટ થઈ રહ્યો છે, જે સૂચવે છે કે આગામી સમયમાં વ્યાજ દરોમાં વધુ વધારો થઈ શકે છે. HSBC ના અર્થશાસ્ત્રીઓના મતે, બેંક ઓફ જાપાનનો અભિગમ અત્યારે કડક (Hawkish) જણાઈ રહ્યો છે, જે દર્શાવે છે કે એપ્રિલ સુધીમાં વ્યાજ દરો 1 ટકા સુધી પહોંચી શકે છે.
ચૂંટણીના ટૂંકા પ્રચાર ગાળા અને આર્થિક નીતિઓમાં ફેરફારને કારણે હવે આખું વિશ્વ જાપાનની આગામી ચૂંટણી અને સેન્ટ્રલ બેંકના નિર્ણયો પર નજર રાખી રહ્યું છે.
