ભારતીય રિફાઇનિંગ જાયન્ટ રિલાયન્સ ઇન્ડસ્ટ્રીઝ (Reliance Industries) સહિત ભારતીય રિફાઇનર્સ રશિયન ક્રૂડ ઓઇલની આયાતમાં નોંધપાત્ર ઘટાડો કરી રહી છે. વિવિધ અખબારી સંસ્થાઓનાં અહેવાલ મુજબ આ વ્યૂહાત્મક ફેરફાર કંપની પશ્ચિમી પ્રતિબંધોનું પાલન કરવા અને તેના રિફાઇન્ડ પેટ્રોલિયમ ઉત્પાદનો માટે યુ.એસ. (US) અને યુરોપિયન બજારોમાં તેની મહત્વપૂર્ણ પહોંચને સુરક્ષિત રાખવા માટે કરી રહી છે.
સૂત્રોને ટાંકીએ તો, ધ ટાઇમ્સ ઑફ ઇન્ડિયા (The Times of India) એ નોંધ્યું છે કે આ પગલું યુ.એસ. દ્વારા મુખ્ય રશિયન તેલ નિકાસકારો પરના તાજેતરના પ્રતિબંધોને પગલે લેવામાં આવ્યું છે. ઇન્ડિયા ટુડે (India Today) એ પુષ્ટિ કરી કે રિલાયન્સે સત્તાવાર રીતે જણાવ્યું છે કે તે યુ.એસ. અને પશ્ચિમી રશિયન ઓઇલ પ્રતિબંધોનું સંપૂર્ણપણે પાલન કરશે અને પાલનની જરૂરિયાતોને પહોંચી વળવા માટે તેની રિફાઇનરી કામગીરીમાં ફેરફાર કરશે.
આ ઉપરાંત, રિલાયન્સે જણાવ્યુ મુજબ પ્રતિબંધિત કંપનીઓ સાથેના સતત વ્યવહારો ગૌણ પ્રતિબંધોનું નોંધપાત્ર જોખમ ધરાવે છે, જે કંપની ‘સહન કરી શકે તેમ નથી’ કારણ કે યુ.એસ.માં તેમના માટે એક મહત્વનું માર્કેટ છે.
આ પહેલાં ઓક્ટોબરમાં રિલાયન્સની રશિયન ક્રૂડની આયાતમાં પાછલા મહિનાની સરખામણીમાં ૨૪% નો ઘટાડો થયો હતો. મોટાભાગનાં ભારતીય રિફાઇનર્સ હવે રશિયાની બદલે લેટિન અમેરિકા, મધ્ય-પૂર્વ અને ખાડી દેશો તથા વેસ્ટ આફ્રિકાનાં દેશો તરફ વળી રહ્યા છે, જે ભારતની સ્ટ્રેટેજીક ડિપ્લોમેસી સ્પષ્ટ કરે છે.
ધ ઇકોનોમિક ટાઇમ્સ (The Economic Times) માં નોંધાયેલા વિગતવાર આંકડાઓ અનુસાર, સાઉદી અરેબિયા અને ઇરાક જેવા દેશોમાંથી આયાતમાં વધારો થયો હતો, અને યુનાઇટેડ સ્ટેટ્સમાંથી ક્રૂડની ખરીદી લગભગ બમણી થઈ હતી.
